ضلع مردان کے علاقے سپینکئی میں نہر اپر سوات کے کنارے واقع تاریخی ریسٹ ہاؤس محکمہ آبپاشی کی مسلسل غفلت اور لاپروائی کے باعث کھنڈرات میں تبدیل ہو چکا ہے۔ یہ ریسٹ ہاؤس 1907ء میں نہر اپر سوات کی تعمیر کے ساتھ ساتھ تاج برطانیہ کے انتظامی افسران کے قیام کے لیے تعمیر کیے گئے تقریباً 11 ریسٹ ہاؤسز میں سے ایک ہے۔ آزادی کے بعد یہ عمارت محکمہ آبپاشی کی تحویل میں دے دی گئی تھی۔ اپنے منفرد محل وقوع اور خوبصورت قدرتی مناظر کی وجہ سے مشہور یہ عمارت آج بھوت بنگلے کا منظر پیش کر رہی ہے۔ چھتیں منہدم ہو چکی ہیں، فرنیچر اور دیگر قیمتی سامان غائب ہے، اور اب یہاں صرف چمگاڈروں کا بسیرا ہے۔

لوکل کونسل چیئرمین سجاد عالم کے مطابق ریسٹ ہاؤس کی حفاظت کے لیے چھ اہلکار تعینات ہیں جو تنخواہ اور مراعات تو باقاعدگی سے وصول کر رہے ہیں لیکن ڈیوٹی نہیں دیتے۔ انہوں نے بتایا کہ عمارت کا قدیم فرنیچر اور قیمتی سامان ملازمین اور مقامی افراد اٹھا لے گئے ہیں۔

باخبر ذرائع کے مطابق صوبائی حکومت کی جانب سے ریسٹ ہاؤس کی مرمت کے لیے کئی بار فنڈز جاری کیے گئے، تاہم مختلف حکومتوں کے ادوار میں ایک روپیہ بھی عمارت پر خرچ نہیں کیا گیا

پاک افغان سرحدی کشیدگی کے باعث نو ماہ سے افغانستان میں پھنسی پاکستانی ٹرانزٹ ٹریڈ کی گاڑیوں کو وطن واپسی کی اجازت مل گئی ہے۔ طورخم بارڈر کے راستے یہ گاڑیاں پاکستان میں داخل ہونا شروع ہوگئی ہیں۔اکتوبر 2025ء میں پاکستان اور افغانستان کے مابین کشیدگی اور سرحدی جھڑپوں کے بعد سرحد بند ہوگئی تھی، جس کے نتیجے میں افغان ٹرانزٹ ٹریڈ کے کنٹینرز اور ایکسپورٹ سمیت تقریباً 1600 پاکستانی گاڑیاں افغانستان میں پھنس گئی تھیں۔ ٹرانسپورٹرز اور ڈرائیورز کئی ماہ سے گاڑیوں کی واپسی کے لیے احتجاج کر رہے تھے۔گزشتہ روز گاڑیوں کے مالکان اور ٹرانسپورٹرز نے طورخم بارڈر پر افغان پناہ گزینوں کی وطن واپسی کا عمل بھی احتجاجاً روک دیا تھا۔ بعد ازاں انتظامیہ کے ساتھ مذاکرات کے بعد پناہ گزینوں کی واپسی بحال کر دی گئی۔پاک افغان جوائنٹ چیمبر آف کامرس کے اعداد و شمار کے مطابق نو ماہ کی طویل بندش سے پاکستان کو 278 ارب روپے جبکہ افغانستان کو 140 ارب روپے کے نقصان کا سامنا کرنا پڑا۔

کوئٹہ میں پولیس اہلکاروں کے قتل کے خلاف دھرنا مذاکرات کی ناکامی کے بعد مزید شدت اختیار کر گیا ہے۔ منگل کی شب صوبائی وزیر داخلہ میر ضیا اللہ لانگو اور وزیر صحت بخت محمد کاکڑ پر مشتمل حکومتی کمیٹی نے دھرنے کے نمائندوں اور آل پارٹیز رہنماؤں سے کئی گھنٹے مذاکرات کیے، تاہم فریقین کسی معاہدے پر متفق نہ ہو سکے۔ ذرائع کے مطابق دونوں طرف سے رابطے جاری رکھنے پر اتفاق ہوا ہے، مگر دھرنا ختم کرنے کا کوئی فیصلہ نہیں ہو سکا۔

مظاہرین نے حکومت کو خبردار کیا ہے کہ مطالبات تسلیم نہ کیے گئے تو احتجاج مزید پھیلایا جائے گا۔ لواحقین نے آج سے صوبے بھر میں مظاہروں اور 17 جولائی کو مکمل شٹر ڈاؤن ہڑتال کی کال دی ہے۔

سمنگلی روڈ پر کوئلہ پھاٹک کے مقام پر سات پولیس اہلکاروں کی میتوں کے ہمراہ دھرنا مسلسل جاری ہے۔ دھرنے میں پشتونخوا ملی عوامی پارٹی، اے این پی، جے یو آئی-ف، تحریک انصاف، این ڈی ایم اور پشتونخوا نیپ شریک ہیں، جبکہ وکلا، سول سوسائٹی اور طلبہ تنظیموں کی آمد کا سلسلہ بھی جاری ہے۔

احتجاجی کمیٹی اور آل پارٹیز رہنماؤں کا مؤقف ہے کہ ان کا مقصد مالی امداد یا اعلانات نہیں بلکہ سانحے کی مکمل حقیقت سامنے لانا ہے۔ ان کے مطالبات میں واقعے کی تحقیقات کے لیے آزاد جوڈیشل کمیشن کا قیام، سکیورٹی میں غفلت کے ذمہ دار افسران کے خلاف کارروائی، علاقے میں مسلح گروہوں کے خلاف مؤثر اقدامات اور لیویز فورس کی سابقہ حیثیت کی بحالی شامل ہیں۔ حکومت کا مؤقف ہے کہ واقعے میں ملوث عناصر کے خلاف کارروائیاں جاری ہیں، تاہم مظاہرین کا کہنا ہے کہ وہ محض یقین دہانیوں پر دھرنا ختم نہیں کریں گے۔

چھ جولائی کو ضلع زیارت کے علاقے مانگی ڈیم فیز تھری کی تعمیراتی سائٹ پر نامعلوم مسلح افراد نے حملہ کیا تھا، جس میں دو ایس ایچ اوز سمیت نو پولیس اہلکار جاں بحق ہو گئے تھے اور 21 اہلکاروں کو اغوا کر لیا گیا تھا۔ سکیورٹی فورسز کے ریسکیو آپریشن کے دوران عسکریت پسندوں نے مغوی اہلکاروں کو قتل کر کے ان کی لاشیں زرغون غر کے علاقے میں پھینک دیں، جس سے مجموعی ہلاکتوں کی تعداد 30 ہو گئی۔ لواحقین نے ابتدا میں زیارت میں احتجاج کیا، بعد ازاں میتوں کے ہمراہ کوئٹہ منتقل ہو کر کوئلہ پھاٹک پر دھرنا دیا۔ متعدد شہداء کی تدفین ہو چکی ہے، تاہم سات میتیں علامتی احتجاج کے طور پر اب بھی موجود ہیں۔

پاکستان کے زیر انتظام کشمیر میں آج 14 اپریل کو پہلی بار حکومتی سرپرستی میں پہاڑی زبان کا دن منایا جا رہا ہے۔ آزاد کشمیر کی وزیر برائے کشمیر کاز، آرٹس، لینگویجز اینڈ انوائرمنٹ نبیلہ ایوب ایڈووکیٹ نے اس موقع پر راولا کوٹ میں منعقد مرکزی تقریب سے خطاب کیا۔چودہ اپریل کو پہاڑی زبان کا دن منانے کا آغاز 2024ء میں سماجی اور ادبی حلقوں کی پہل پر ہوا تھا، تاہم اس سال پہلی بار آزاد کشمیر حکومت نے سرکاری سطح پر اس دن کو منانے کا فیصلہ کیا۔ اس ضمن میں مختلف شہروں میں ادبی اور ثقافتی تقریبات کا اہتمام کیا گیا۔یہ اقوام متحدہ کا تسلیم شدہ دن نہیں بلکہ کشمیری برادری کا اپنا اعلان کردہ ایونٹ ہے۔ وزیر نبیلہ ایوب کا کہنا ہے کہ آزاد کشمیر کے آئین کی دفعہ 24 کے تحت مادری زبانوں اور ادب کا فروغ حکومت کی ذمہ داری ہے، اور اس مقصد کے لیے آزاد کشمیر کلچرل اکیڈمی کو فعال کردار ادا کرنا ہوگا۔ انہوں نے تعلیمی اداروں میں علاقائی زبانوں کی تدریس، ادبی بورڈز کی سرگرمیوں اور ڈیجیٹل پلیٹ فارمز پر پہاڑی زبان کی موجودگی بڑھانے کے لیے اقدامات کا عندیہ بھی دیا۔پہاڑی زبان صدیوں سے اس خطے کی تہذیبی شناخت کی حامل رہی ہے اور اس زبان کو باضابطہ تعلیمی نصاب کا حصہ بنانے اور تحقیقی کام کی حوصلہ افزائی کے لیے تجاویز زیر غور ہیں۔

تونسہ شریف کے کاشتکار، سماجی کارکن، کسان بورڈ تحصیل تونسہ اور ’’چشمہ رائٹ بینک کینال بحالی تحریک‘‘ نے چشمہ رائٹ بینک کینال میں پانی کی مسلسل قلت اور نہر کی بندش کے خلاف 14 جولائی کو صبح 9 بجے ٹریکٹر مارچ کا اعلان کیا ہے۔یہ مارچ سابق امیدوار صوبائی اسمبلی، عزیز اللہ قیصرانی کی زیر قیادت ہونے جا رہا ہے۔کسان بورڈ کے مطابق ٹریکٹر ٹرالیوں پر مشتمل ریلی تونسہ کے علاقے ریتڑہ سے شروع ہوگی اور ٹبی قیصرانی، کھڈ بزدار، ترمن، رمک اور پروآ سے ہوتی ہوئی خیبر پختونخوا کے ضلع ڈیرہ اسماعیل خان پہنچے گی، جہاں واپڈا اور مقامی انتظامیہ کے دفاتر کے سامنے احتجاج ریکارڈ کرایا جائے گا۔کسان رہنماؤں کا کہنا ہے کہ اگر اس احتجاج کے باوجود وفاقی اور صوبائی حکومتوں نے تونسہ کو اس کے حصے کا پانی فراہم نہ کیا تو احتجاجی تحریک کا اگلا مرحلہ اسلام آباد کی جانب لانگ مارچ ہوگا۔منتظمین کا کہنا ہے کہ چشمہ رائٹ بینک کینال میں گزشتہ چار ماہ سے پانی کی فراہمی معطل ہے، جس کے باعث نہر خشک ہو چکی ہے اور خطے کی زرعی معیشت شدید متاثر ہوئی ہے۔ ان کے مطابق پانی کی عدم دستیابی سے کپاس اور گنے کی 50 سے 60 فیصد فصلیں تباہ ہو چکی ہیں جبکہ آئندہ گندم کی فصل کی تیاری بھی خطرے سے دوچار ہے۔کسان تنظیموں کے مطابق ترمن، کھڈ بزدار، کاٹھ گڑھ، ٹبہ امام، نور احمد والی، نتکانی، ٹبی قیصرانی، ریتڑہ، ناڑی، تونسہ شریف، کریم والا، مکول کلاں، احمدانی اور نہر کے ٹیل پر واقع قمبر پل سمیت متعدد علاقے پانی کی شدید قلت سے متاثر ہیں۔رکن قومی اسمبلی خواجہ شیراز محمود نے بھی قومی اسمبلی میں پنجاب کے حصے کے پانی کا مطالبہ کرتے ہوئے کہا ہے کہ پنجاب کو اس کے جائز حصے سے محروم رکھنا کسانوں کے ساتھ ناانصافی ہے۔کسان بورڈ ضلع ڈیرہ غازی خان کے صدر اعجاز حسین بلوچ اور دیگر رہنماؤں کا کہنا ہے کہ بین الصوبائی معاہدوں کے تحت چشمہ رائٹ بینک کینال کے ذریعے پنجاب، بالخصوص تونسہ، کو اس کا قانونی حصہ ملنا چاہیے۔ انہوں نے الزام عائد کیا کہ ڈیرہ اسماعیل خان کی حدود میں بااثر افراد کی جانب سے مبینہ پانی چوری کے باعث نہر کے آخری حصوں تک پانی نہیں پہنچ رہا، اس لیے واپڈا فوری کارروائی کرکے پانی کی منصفانہ تقسیم یقینی بنائے۔